Zalig Kaesjmis en Gelökkig Nuujjaor

Zalig Kaesjmis en Gelökkig Nuujjaor

Column: Dan sjrief mer plat:

Zalig Kaesjmis en Gelökkig Nuujjaor

 

De twiè meis gebroekde weurd in december en jannewari, gesjreve of gekald en in welke taal dan ouch, zint Kaesjmis en Nuujjaor. Mèt de twiè Kaesjdaag wunsje veer ós alleneij ‘n Zalig Kaesjmis! En in jannewarie wunsje veer ós ‘n Zalig Nuujjaor! En dan neet allein op Nuujjaorsdaag, mer 6 daag lank tot aan Drie Keuninge.

Mer is ’t noe Zalig Kaesjmis, Gelökkig Kaesjmis of wunsje veer ós Sjoan Kaesjdaag? En ouch mèt Nuujjaor; is ’t Zalig of Gelökkig Nuujjaor? In eker geval ’t woord Zalig wurt hiej ummer minder gebroek en geit al langzaamaan richting vergaete weurd.
Wat nuuj is, is dat veer ós op 31 december ‘n Oudjaor toewunsje; ‘ne Sjoane jaorswisseling; ‘ne Goje roestj; ’n Good oeteind. Hiej oet bliek dat de wunsj van dizze daag get creatiever is.

En wat mèt Nuujjaorouch al richting vergaethook geit, is ’t verrasje biej de femilie:
Gans sjtil en sjtiekem nao binne sjlupe en es ièsjte ekerein verrasje mèt ‘t versje:
“Zalig Nuujjaor, de kop vol haor, de mónd vol teng, waffel in de heng”
en dan houpe dasse verrasjgeld kreegs um mèt ’n dieke buèsj heivesj te gaon. ’t Nuuje jaor waor dan pas ech begós.

En naeve ’t alum bekènde “Zalig Kaesjmis en ’n Gelökkig Nuujjaor”, wunsj ich uch ouch:

’t Inchecke van vluch 2017 is aangekóndigd.
De tösjelandinge zin: gelök, gezóndheid, leefde en vrundsjap.
De vluch doert 12 maond.
Nao de landing kèn se dich um 24 oer biej gank 31 melle.

Goje reis en ’n Zalig Nuujjaor!

 

Laes editie 1-10 van #de Hulsberger